Rehoha Ára Guive

Kóina ápe rehendúta
Ipahaite, Juliana
Asufrívanga ko'ág̃a
Rehoha ára guive

Ndajuhuvéi mamove
Vy'ami, chéve ya opáma
Porque nde ya cherejáma
Pytûmbýpe cheañoite

Og̃uahê ku ka'aru
Chejopy techaga'u
Hi'ãiténte ku ahendu
Nde puka ha ne ñe'ê

Nacherendái mamove
Aheka ne mborayhu
Aipotánteko reju
Rohecha amano mboyve

Añeñóvo akehag̃ua
Nde rerami ahenói
Ha mante chemyangekói
Che keguýpe ne ãngue

Upégui apáy rire
Techaga'u chemyatimói
Tesaýma ndajokói
Ku ko'êmbaite peve

Apu'ã ha aha aguapy
Upéicha cheko'êmba
Ajopy ko che py'a
Tupãsýme cherasê

Ajerure ichupe
La anihag̃ua neñaña
Rejujevýnte hag̃ua
Tahesãi che rekove

Ndavy'áinteko, Julí
Ndavy'ái ne pore'ỹme
Aipotánte pukavýpe
Jepiguáicha reg̃uahê

Upévo tajesape
Nde resa jajái asýpe
Kunu'û, py'aguapýpe
Rohetû, romoñe'ê

Ahechámajepe che
Hatãha ne korasõ
Ajeve resê reho
Ndepochy nune ra'e

Pero che ag̃aite peve
Aikóva roha'ãrõ
Rejujevývo jaiko
Kunu'ûme oñondive