Aikosénte

Aikosénte yvytúrõ
Ha nde ypýrupi ahasakuévo
Vevuimi roipejukuévo
Tahetû pe nde syva
Ha upéi ku mitã ñañáicha
Tamyasãimba pe nde áva
Iñapopê, hyjuipáva
Ha uperire tahasa

Aikosénte yvotýrõ
Taimemi nde yvotytýpe
Ha reju ne kuã apỹipe
Chepo'o mbeguekatu
Nde pópe tachemoî
Ha neaño reikuaaháicha
Chemoñe'ê ku mitãicha
Ha uperire che retû

Chemoî nde pyti'áre
Taikomi nde jeguakárõ
Ha py'ỹi chemomorãvo
Ejaivy ha cheretû
Ha upekuévo renohê
Vevuimi nde pukavýpe
Rerekóva ne angapýpe
Hendýta ne mborayhu

Aikosénte ne mbo'ýrõ
Ndajúri ñasãingohápe
Taikove nde rayhupápe
Upépente che añomi
Sapy'ánte rejaivývo
Tahecha kirirîhápe
Rerekóva ñemihápe
Mokõi guyratîmimi

Aikosénte akãngytárõ
Taimemi pe ne akãguýpe
Ñaneaño pe pytûmbýpe
Tachejopy nde rova
Ha upeichahágui nde kéra
Vevuimi rejerekuévo
Nde juru ohasakuévo
Ha'e tacheretûmba

Hi'ãnte reikuaa'ỹre
Aiko pe yva ajúrõ
Ha ne rãi chembojurúvo
Ne rembe tachepyte
Nde yuhéi amboguekuévo
Tacherapy nde ratápe
Ag̃uahênguévo yvápe
Ta'u pe nde eirete