Palästinalied

Palästinalied

Allererst lebe ich mir werde,
sit min sündic ouge siht
daz here lant und ouch die erde
der man vil der eren giht.
Mirst geschehen des ich ie bat:
Ich bin komen an die stat
Da got mennischlichen trat.

Schoeniu lant rich unde here,
Swazich der noch han gesehen,
so bist duz ir aller ere,
waz ist wunders hie geschehen!
Daz ein Magd ein kint gebar
Here über aller engel schar,
was daz niht ein wunder gar?

Hie liez er sich reine toufen,
daz der mensche reine si.
Do liez er sich hie verkoufen,
daz wir eigen wurden fri.
Anders waeren wir verlorn.
Wol dir, sper, kriuz unde dorn!

Hinne four der sun zer helle
Von dem grabe, da'r inne lac.
Des was ie der vater geselle
Und der geist, den niemand mac
Sunder scheiden: est al ein,
sleht und ebener danne ein zein,
als er abrahame erschein.

Dar nach war er in dem lande
Vierzic tage: do four er dar
Dannen in sin vater sande.
Sinen geist, der uns bewar,
den sant er hin wider zehant.
Heilic ist daz selbe lant:
Sin name der ist vor gote erkant.

Unser lantrehtaere tihten
Fristet da niemandes klage;
Wan er zestunden rihten,
so ez ist an dem lesten tage:
und swer deheine schulde hie lat
unverebenet, wie der stat
dort da er pfant noch bürgen hat!

Kristen juden und die heiden
Jehent daz diz ir erbe si:
Got müez ez der rehte scheiden
Durch die sine namen dri.
Al diu werlt diu stritet her:
Wir sin an der rehten ger:
Reht ist daz er uns gewer.