Penera'ãrõvo

Péinako la guerra opa
Py'aguapy oî jeýta
Ko'águi ñañembyatýta
Ñambo-viva ko tetã
Cañón, mortero, mboka
Umíva ñañongatúta
Rozádoma jaiguyrúta
Ñañemitỹma hag̃ua

Machéteke tahãimbe
Tahi'ýva porãke azada
Ñamyengoviami espada
Chácope iporupyre
Ha buey yunta karape
Ñamyakãsã yugo guýpe
Amarayvimi kangýpe
Súrcore ñamoma'ê

Jaikohaguéicha kuehe
Jajapo campo de tiro
Estaca, tala ha nido
Umíva ñande kokue
Ñacumplipáma rire
La Pátriape jadebéva
Hi'ãma arado mancera
Japokomívo hese

Ápé kóinava jareko
Yvy fisco ipukukuévo
Ha don Genaro Romero
Tuicha penera'ãrõ
Ichupe ku oipytyvõ
Diario chu'i maymárõ
Ko'êramo pejupárõ
Jaikéta ñamba'apo

Anínteke ñahendu
Omoingéva oñoakãme
Ohóvo ambue tetãme
Ohekávo pytu'u
Ko'ápe avei ikatu
Jajuhu ohechakuaáva
Karai imba'eporãva
Oñohêva'erã pe iviru

Ñaimembárõ oñondive
Guerrakue ñamyengoviáta
¡Anínte ñandejuráta
Político tujukue!
Umíva korasõme oime
Mbói chini ojapakuáva
Ñane retãnte oikuaáva
Umi bicho raîvore

Ñañotỹnteke avati
Petỹ, mandyju, naranja
Umíva hína esperanza
Oro sellado voi
Kumanda ha manduvi
Kurãpêpê ijapytépe
Topukavy nde kokuépe
Heta piña avakachi

Pakova ha takuare'ê
Café, mango, mandarina
Mamóne, aguacate, lima
Nde rógare tojere
Jaju ko asaje pyte
Vokói ñamba'apohágui
Ãva guýpe javy'águi
Jaguapy jaterere

Oguapývo ka'a rykue
Sakarô, locro oguejýma
Mesápe ku jaguapýma
Jakarumi oñondive
Toúke avati maimbe
Tembi'u týra hevéva
Paraguái rembi'uetéva
Roráre kamby jygue

Kyha chipa ñañotî
Piro'ýva yvyraguýpe
Ñande ra'y ñande ypýpe
Toguapymi toscribí
Ipizárrare tomoî
Ideber-rãmi ko'êrõ
Te'i lección ome'êvo
¡Patria moriré por ti!

¿Péicharõpa, kuimba'e
Mba'ére ñaikotevêne?
¿Mba'e apóvo jahaséne
Jaheka tetã ambue?
Ñane retã porãite
Jaikorire hayhupápe
Ha ñamoî hendag̃uame
¿Ñañemyrõta ichupe?

Chéko ajúma tenonde
Tenonde ahahaguéicha
Avy'áne kuimba'éicha
Pejupárõ pendeave
Kóina ã pomberokue
Pende relévo-pe ohóta
¡Hasýpe haposoróta
Sandia yvyguy pahague!