Talkshow Paranoia

Talkshow Paranoia

i huck ummanånda
und mia is so fad
i hå zur zeit koa håckn
und i woaß nid wås i tat
da tåg is lånk da himme graa
mia is schoa gånz åchtla
und es sexatragei
is schoa wieda laa
i flag mi aufn diwan
schålt es fernsehkastl ei
suach ma wås zan åschaun
auf de 34 kanai
übaråll da gleiche schas
oa talkshow nåch da åndang
und jeda redt an kas
a weibaleit aus sachsn
håt a ufo gseachn
sie såg de mandla håmb zwa köpf
und blåbe zeachn
a bauanbua gibt zua
es wår a fehla mitn koksn
und an hittnwiacht aus bayern
is a gamsbåcht gwåchsn
da ringo aus berlin
håt an roatliachtkomplex
jeds mål wånn a åmpe roat wecht
braucht da årme heita sex
de desiree aus hamburg
håt se 4 jåhr neama gwåschn
und da herbert aus goisern
kånn mit der ohrwaschla påschn
a postla aus hamburg
glab er is a hydrant
låßt 2 mål am tåg wåssa
und steaht sist nur ummanånd
a lehra glab echt
er hoaßt hiatzt dr specht
er mischt se übaråll ei
weil er glab er håt
hiatzt ibaråll recht
i denk ma wås de drauf håmb
des kå i schoa lång
hol mia an kuglschreiba
und i denk ma wås zsåmm:
mit sex und hoamat
åls einschåltquotenfaktor
mei thema wecht a hit:
i bin intim mit meinem traktor
i schreib n gånzn bledsinn
auf a blattl påpier
fåhr eine auf de post
wo i s 100 x kopier
a markn drauf
weil i s nåchand glei vaschick
an jede talkshowredaktion
zwischn wean und rejkiavik
am nåchstn tåg
da bricht da liachte wahnsinn aus
es telefon geaht iba
muats a auflauf vor mein haus
wås is går gscheachn
wås sollt i går sågn
17 kabesenda wollnt mi
in da talk show håbn
i denk ma es is wuascht
i hån eah nix zan toa
ob i ba da vera huck
oda ob i sist wo loa
i fåhr eschte klass nåch wean
und de gage is a nid låb
es steahnt an haufn nulla
hintan oasa en vatråg
in da sendung håmb se gfrågt
wieso i s mit mein traktor tua
då hå i nåchand gsågt:
i bin hålt so alloa
i hån neamp auf dera kåltn welt
mei lebn wa völlig sinnlos
wånn i nid mein traktor hätt
de vera håt gschluckt
und gånz betroffn gschaut
en studio is stat gwen
koa mucks und koa laut
de augn gånz glåsig
und de stimma gånz dünn
de leit sen ålle
unheimlich betroffn gwen
nåch 3 4 minutn
håmb se ålle wida kriagt
de vera håt
de letztn zacha åbegwürgt
de gerti senga håt gsågt
i bin s symbol fi insa zeit:
liebe zur technik
stått zwischenmenschlichkeit
es echo auf mein auftritt
oafåch phänomenal
i und mei traktor
auf jedn kanal
va sålzburg tv bis cnn
ålls nur oa headline:

tractor fuckin man
hiatzt bin i
da absolute medienstar
de diana und de heli zilk
de teant se gegn mi schwa
bunte news und neue post
ålle wollnt se wissn wås
wås a homestory kost
åba bist amål a supastar
nåchand wescht gjågt
17 månaleit aus idaho
de håmb mi vaklågt
da streitwert is auf
8 mullionen dollar festgsetzt
de kläger håmb se ban hantiern
an eanam traktor verletzt
8 millionen dollar
is fi mi ghupft wia gsprunga
weil mei lebn wecht hiatz vafilmt
und van elton john besunga
a traktorfirma aus saskatchewan
zåhlt ma leicht des doppelte
fi a werbekampagne
i hån a villa in malibu
a penthouse l.a.
a loft in new york
und a häusl in michee
a schloß an da loire
an stock van empire state
und in lasseng kaf i ma s
häusei van bill gates
åba gestang aufn åbnd
då is påssiacht
de schante va new york
håmb mi inhaftiacht
mit håndschelln und blauliacht
und rechte valesn
i såg enk ehrlich wåhr
des is koa gaude gwesn
seit heit in da friah
woaß i n grund fi s theater
mei traktor håt an ånwålt
und zwoa psychiater
ålle sågt i hån
va oana chance koan hauch
weil die anklage lautet auf
traktormißbrauch
mei ånwålt håt ma nur mehr
de rechnung gschickt
er sågt: traktormißbrauch
is vü z årg åls delikt
die geschwornen send gegn mi
da richta schreit pfui
und verkündet des urteil:
elektrischa stuhl
hiatz sitz i auf n sessl
und de schwesta hålt mei hånd
mia schaun auf n zoaga
va da uh auf da wånd
der is glei auf zwöfe
hiatz schåltnt se ei
es måcht no an schnålza
und ålls is vabei
zescht is gånz finsta
åba nåchand wechts liacht
i gspia wia s mi
gånz långsåm aufeziacht
durch durch an tunndl
und vor de himmeti
då steaht schoa
da petrus und frågt:

wo tean man denn hi?
an plåtz en himme
den kånn i vagessn
mit meina traktorgschicht
hå i ma s vaschissn
åba gånz in die höll
des wa a a bissl hårt
da petrus denkt nåch
und sågt: då gabats no so an ort
i kunnt fi 400 jåhr
ins fegefoia
nåchand wa mei seele wieda
wia åls a noia
a engei sågt daß mir jå
sowieso koa wåhl nid bleib
i denk ma wås sollt i denn toa
und intaschreib
i måch de ti auf
und i brunz mi fåst ån
des fegefoia is
a riesn tålkshow-studio
mit da vera und n schiejok
und da arabella
mitn goldie und n zilk
und n andre heller
mit n niki lauda
und n bischof laun
mitn pornojäger humer
und an åndang clown
mit da gerti senger
und da rotraut perner
mit da bärbel schäfer
und n johannes b kerner
mit günter nenning
und da dagi koller
mit n alfons haider
und n günter tolar
mit da schreinemakes gretl
und n meiser håns
mit n grissmann werner
und n klammer frånz
mit da hera lind
und da ilona christen
mit da vera am mittåg
und no so ach kistn
mit n reini fendrich
und n jörg wontorra
mit n gerhard berger
und an åndan geistafåhra
mit n jürgen fliege
und da ulla kock am brink
mit n hinz und n kunz
und mitn petl flink
mit n gigl und n gågl
und n lugna mausi
bittschea hechts hiatzt nåchand auf
weil långsåm wechts grausig
mitn an deppatn ossi
und n supagscheidn wessi
mit n flippie und n skippy
und n rex und da lassie
mit da domina in leda
und an sklavn in lack
mit an gorilla im bikini
und schimpansn in frack
mit gscheid und mit bled
und mit ålt und mit jung
und de hålbatn vesteahst nid
wegn an piercing auf da zung
mit n fettn hermes
und n schwuln guntha
und auf oamål her i
mi selba schrein
und nåchand wer i munta