Ko'ápe Che Avy'ave

Ko'ápe che avy'ave umi pytagua retãgui
Ndo'ái tata che reságui, hekoguapy che rete
Vaípe aikórõ guare ndahechavéi ni che képe
Maymarõite che rapépe hokypu vy'apavê

Ñandejárante raka'e chesambyhy chererúvo
Che rekove amboyvytúvo aña raitýgui aveve
Yma ymave guare teko asykue cherejáma
Veneno rykue hypáma chemoakãnga'úmi va'ekue

Ko'ápeko che ahendu música pu memetéva
Umi guyra oñe'êva ha oguerúva pytu'u
Oime makagua arandu ha umi jaku retakuére
Okokoréma óga jerére hesakãvo ko'êju

Ikangymíva yvytu ou amo mombyrýgui
Ogueru ka'aguypýgui obrajero hácha pu
Kyre'ỹme ñahendu tapicha oharyvóva
Umi yvyra iporo'óva oipotágui upe viru

Ha tóldope pyhare guaikuru opurahéiva
Chícha ho'úrõ ndokéiva, osavaipo joaite
Iñapesãmba ojuehe ha ojeroky umi kuñáva
Ñahendu omoporarãva pe guasu pysãpêngue

Ha sábado ka'aru ka'aguygua osê okápe
Ijatypa carreríape ha oiko ku talla, ayvu
Jáma oiko mbarakapu, jeroky katu ipahápe
Ñaroko'êne mongetápe chaqueña ra'y rusu

Guahógui ohua'îmbaite oîhaichagua estanciero
Alambrador ha asierréro, mitã ka'avo meme
Kuña apytépe toike tojerokýke la ipúva
Ñahendúma omombe'úva Salomón rekovekue

Ko'ápe che avy'ave umi pytagua retãgui
Ndo'ái tata che reságui, hekoguapy che rete
Florídapema aime yvagapýperô guáicha
Ko'êre aveve guyráicha che tyre'ỹrô jepe