Kuñataî (feat. Maggi Ortigoza)

Eguapýna, che reindy
Sapy'aite ehendu
Peteî ñe'êngatu
Ndéve g̃uarã herupy

Che ãngape otyky
Eirete añandu porã
Che vy'a'ỹ ojora
Nde reko, che tupãsy

Pe ne ryakuã pacholi
Ha nde rete ñembo'y
Hendápe nardo poty
Oguahêvo ko'êtî

Nde resa hû omimbi
Azabache ha'ete
Nde tyvyta iñapopê
Tupãsy kuñataî

Nde pýgui ne akãmeve
Hi'ãnte aropurahéi
Ha añe'ê ndaikatuvéi
Pe tavy tuichágui aje

Reínte amomorãse
Ne ñe'ê ha nde puka
Apytáma che kangypa
Ama'êgui nderehe

Pajépa, che reindymi
Nde ropeami angaipa
Ajevérõ ã che resa
Ndaipe'avéi ndehegui

Ajéipo nde jurumi
Aha'ãramo katu
Apytáne cheñe'êngu
Vy'águi, kuñataî

Nde ávami ha'ete
Rosa ty poty jera
Ha granada aju pytã
Upeichaite ne rembe

Ha rosa morotîete
Mosqueta pe ikuaapy
Upeicha nde, che reindy
Iporã nde rekove

Ne akã ári kambuchi
Toañuã arasa poty
Ha ykua rapére eguejy
Nde guata koni koni

Nde juru guavirami
Opukavy tahecha
Ha ipurahéipe guyra
Tandeaty, kuñataî