Nun So Geluso

'A che stó' facenno 'ammore
Cu 'sta 'mpésa 'e Cuncettina
Maje nun passa na matina
Che nun c'îmm' 'a appiccecà

Cuncettina è sartulélla
Va cu 'a moda e 'a fantasia
E pirció ca, 'mmiez'â via
Maje cujèta 'a fanno stà

E io nce soffro pecché 'a voglio bene assaje
E pe' chesto stó' passanno tanta guaje

No, nun è ca i' só' geluso 'e Cuncettina
Pecché saccio comme e quanto mme vò' bene
Ma pe' stu bene, ca va e ca vène
Io, cierti ccose, nun mm' 'e ffido 'e suppurtà

Per esempio, ajére ô juorno
Mme nce sóngo appiccecato
Pe' nu pèttene 'ndurato
Ca s'aveva miso ccà

Po' purtava nu scarpino
Piccerillo piccerillo
Chillu pède, ch'è tantillo
Se fermavano a guardà

Nun appena mme vedette s'allummaje
E i' dicette: "Manco â casa te ne vaje"

No, nun è ca i' só' geluso 'e Cuncettina
Pecché saccio comme e quanto mme vò' bene
Ma pe' stu bene, ca va e ca vène
Io, cierti ccose, nun mm' 'e ffido 'e suppurtà

E nce simmo appiccecate
N'ata vota stammatina
Pe' na vesta 'e seta fina
Ca, pe' forza, vò' purtà

Ll'ha 'ntuppata1 nu signore
Doppo po' nu surdatiello
E nu bellu munaciello
Ll'aggio 'ntiso 'e suspirà

E aggio visto tutta quanta 'a funzione
Mm'arraggiavo ma dicevo: "Hanno ragione"

No, nun è ca i' só' geluso 'e Cuncettina
Pecché saccio comme e quanto mme vò' bene
Ma pe' stu bene, ca va e ca vène
Io, cierti ccose, nun mm' 'e ffido 'e suppurtà