Purahéi che rembiayhu mombyrýpe

Pyharevovénte ajesaupimi
Kurusu yvága aheka haguã
Ha ijyva ru'ãme che mba'embyasy
Mandu’a pepópe ikupy ojora

Che ruguy iñe’ẽme nerenói mante
Oipovã che ãnga nde réra satî
Ha che akã mbytépe mbegue katuete
Hesakã jepíva ne ñe'ênguemi

Rohayhu ha'érõ chénte añehendu
Ha jepérõ upéicha vy’a cheañuã
Añandu kuaágui che marangatu
Nde rire guarãrõ nde jeýnteha

Nemba'e memégui ko che rekove
Kunu'û ñe'ême roguerohory
Tog̃uahê ndeypýpe che pópe guare
Ha nde resa'ãme toñemboyvoty

Tandénte che jára ndéve ajerure
Jepeve hi'arérõ jajuecha jey
Ha che pore'ỹme tahorymante
Nemoporãvéva nde resa poty

Ani omomarãtei tesay ñaña
Nde rováre oîva Tupãsy moîngue
Tapiaite ojováinte taiko'ê rasa
Ñe’ẽ poravóre chembo’Eva’ekue

Che nendive'ỹgui nako'êi aja
Vy’a ymaguarépe tajehesape
Tojupi che ãnga tanemongeta
Ojojuhuhápe maymárõ ãngue

Ha ñandepe'áma rirérõ Tupã
Ndajarojeréirõ ñande rekove
Ambue yvypóra ani chereka
Pyhare ipaháva cheaho'i mboyve